Një rrjet i sofistikuar mafioz, i udhëhequr nga Amant Josifi, pronar i KFC dhe Pizza Hut në Shqipëri, ka shtrirë tentakulat e tij nga Tirana në Gjeorgji dhe më tej.
Duke përdorur call center-a dhe struktura offshore, ky grup akuzohet për pastrim masiv parash dhe mashtrime spektakolare, duke përfshirë piramidën famëkeqe Gulf.
Pizza Hut dhe hyrja në tregun shqiptar
Në vitin 2022, Pizza Hut hyri në Shqipëri përmes kompanisë Global Fast Food Albania, duke hapur restorantin e parë në TEG.
Drejtori i Përgjithshëm i kompanisë, Agron Disha, e prezantoi markën si një “eksperiencë të re dhe tërheqëse” për shqiptarët, por sipas hetimeve, Disha është një nga hallkat kryesore të një grupi mafioz shqiptaro-gjeorgjian që përdor këto biznese si fasadë për aktivitete kriminale.
KFC dhe lidhja me piramidën Gulf
Dyqanet KFC, të hapura fillimisht në Tiranë në vitin 2015, ishin pjesë e kompanisë DADU shpk, e cila më vonë u riemërua Global Fast Food Albania. Administratori aktual, Agron Disha, është një figurë e besuar brenda rrjetit mafioz, që menaxhon paratë e pista të krijuara nga mashtrimet me tollonat e naftës të Gulf dhe veprimtaritë e call center-ave.
Në krye të skemës qëndronte Albano Aliko, i njohur për mashtrimin me tollonat e naftës Gulf pas falimentit të kompanisë në vitin 2018, ku klientët humbën miliona euro. Aliko, edhe pas arrestimit dhe lirimit të dyshimtë, ka vazhduar aktivitetet e tij përmes një karteli kompanish në fusha të ndryshme si ndërtimi dhe tregtia.
Rrjeti offshore dhe lidhjet e errëta
Kompania Global Fast Food Albania, e cila kontrollon KFC dhe Pizza Hut, është e lidhur me kompani fantazmë në parajsa fiskale si British Virgin Islands dhe RAK ICC në Emiratet e Bashkuara Arabe. Pronësia e saj ka kaluar nëpër disa kompani offshore për të fshehur gjurmët e vërteta.
Dokumentet tregojnë se kompania kontrollohet nga TP Investment Limited, pronar i së cilës është një emër misterioz, Lela Gelkhvidze, banues në Gjeorgji. Emrat si Revaz Saakadze dhe George Khetsuriani, të dy sipërmarrës gjeorgjianë, janë përmendur si bashkëpunëtorë të ngushtë të Josifit dhe pjesë e skemave mashtruese me call center-a dhe forex.
Amant Josifi dhe lidhjet e tij ndërkombëtare
Amant Josifi, figura qendrore e këtij rrjeti, është shpallur në kërkim ndërkombëtar për mashtrime që arrijnë miliona euro. Sipas SPAK, mbi 173 kallëzime janë bërë kundër tij nga vende të ndryshme si Gjermania, Spanja, dhe Suedia, duke përfshirë platforma si “Aurum Pro” dhe “Crypto Kartal”.
Josifi, i fshehur në Emiratet e Bashkuara Arabe, dyshohet se vazhdon aktivitetin e tij kriminal, ndërsa bizneset e tij në Shqipëri menaxhohen nga bashkëpunëtorët e tij të besuar, përfshirë babain e tij, Aleksandër Josifi.
Pastrimi i parave përmes ndërtimit dhe ushqimit të shpejtë
Për të kamufluar lidhjet kriminale, grupi përdor një skemë komplekse kompanish në ndërtim dhe ushqim të shpejtë. Për shembull, Balkan Investment Group, një kompani ndërtimi e përfshirë në skema mashtrimi, ka aksionerë si Aleksandër Josifi dhe Revaz Saakadze.
Skemat e zbuluara nga hetimet, përfshirë lidhjet me Panama Papers, tregojnë një rrjet global të krijuar për të fshehur paratë e mashtrimeve të call center-ave dhe aktiviteteve të tjera kriminale.
Me biznese që duken të zakonshme si Pizza Hut dhe KFC, rrjeti i drejtuar nga Amant Josifi është një shembull i qartë se si krimi i organizuar përdor fasada për të pastruar paratë dhe për të fshehur gjurmët e tij.
Sfiduese të depërtohet përtej strukturave komplekse offshore dhe manovrave ligjore të këtij rrjeti ndërkombëtar.
