Mbrëmjen e djeshme në redaksinë e JOQ Albania ka mbërritur një denoncim alarmant nga një qytetar, i cili shprehte shqetësimin për ngjarje me protagonist një nxënës të një shkolle 9-vjeçare në Vlorë.
Sipas denoncimit, një nxënës 14-vjeçar është ndaluar nga policia pasi posedonte një armë zjarri të tipit TT dhe 85 fishekë, të cilat u zbuluan gjatë kontrollit në banesën e tij.
Denoncuesi pretendonte gjithashtu se i mituri e kishte sjellë armën me vete në shkollë dhe se kishte publikuar më parë foto dhe video të armës në rrjetet sociale, përfshirë TikTok dhe Snapchat.
Policia e Shtetit ka konfirmuar sot denoncimin e mbërritur në JOQ mbrëmjen e djeshme. 14-vjeçari është arrestuar. i mituri kishte fshehur një pistoletë dhe 130 fishekë luftarakë në një motor pranë një banese.
Nuk dihet si e ka siguruar armën i mituri. Ai do të përballet me veprën penale “armëmbajtje pa leje”. Raste të tilla shqetësuese ngrenë pikëpyetje serioze mbi sigurinë në shkolla.
