Një shpërthim i fuqishëm u regjistrua sot në mëngjes, pak pas orës 10:00, në Calenzano, Toskanë, Itali. Sipas raportimeve të mediave italiane, shpërthimi ndodhi në depot e naftës të Grupit Italian të Hidrokarbureve "Eni," duke shkaktuar një re të madhe me tym të zi që u përhap në zonë.
Sipas burimeve nga vendngjarja, shpërthimi ka rezultuar me dy viktima dhe nëntë të plagosur. Ndërkohë, autoritetet lokale kanë ndërmarrë masa të menjëhershme për të mbrojtur popullsinë e zonës. Departamenti i Mbrojtjes Civile ka shpallur një alarm për një rreze prej 5 kilometrash nga vendi i shpërthimit, duke këshilluar banorët të mbajnë dritaret të mbyllura dhe të shmangin çdo afrim në zonën e prekur.
Njësia e krizës është aktivizuar nga Departamenti i Mbrojtjes Civile dhe po vepron në koordinim të ngushtë me Qendrën Koordinuese të Shpëtimit të Prefekturës për të monitoruar situatën dhe për të ofruar ndihmën e nevojshme. Hetimet për shkaqet e shpërthimit po vazhdojnë, ndërsa ekipet e emergjencës janë ende në vendngjarje për të kontrolluar situatën.
