Në një zhvillim të rëndësishëm në betejën ligjore ndaj TikTok, Gjykata Federale e Apelit për Distriktin e Kolumbisë ka mbështetur një ligj që kërkon që platforma sociale të ndërpresë lidhjet me kompaninë mëmë kineze, ByteDance, ose përndryshe të ndalohet plotësisht në territorin amerikan nga mesi i janarit. Sipas gjyqtarëve, ligji konsiderohet kushtetues, ndërsa apeli i TikTok është refuzuar.
TikTok kishte thirrur Amendamentin e Parë të Kushtetutës së SHBA, duke argumentuar se ishte shënjestruar padrejtësisht dhe se ligji përbënte një shkelje të të drejtës për lirinë e shprehjes. Platforma ka vendosur të apelojë çështjen në Gjykatën e Lartë në përpjekje për të rrëzuar ligjin e miratuar nga Kongresi Amerikan.
Ligji, i njohur si “Shit ose Dëgjo”, u nënshkrua nga presidenti Joe Biden në prill, pas një procesi të gjerë mbështetur nga të dyja partitë kryesore politike në SHBA. Ai u miratua pas informacioneve të siguruara nga agjencitë e inteligjencës, të cilat pretendonin se Pekini mund të përdorte TikTok për të spiunuar qytetarët amerikanë dhe për të përhapur propagandë kineze.
TikTok, i cili numëron mbi 170 milionë përdorues amerikanë, ka argumentuar se ndalimi i platformës do të shkelte të drejtën kushtetuese të fjalës së lirë për përdoruesit e saj.
Edhe në Shqipëri, debati mbi TikTok dhe ndikimin e tij ka filluar të marrë vëmendje, sidomos për ndikimin që platforma mund të ketë te të rinjtë e adoleshentët dhe për shqetësimet mbi privatësinë e të dhënave.
Pak ditë më parë, pas tragjedisë te shkolla “Fan Noli”, kryeministri Rama u shpreh se po shqyrtohet mundësia për mbylljen e Snapchat dhe TikTok edhe në vendin tonë.
