Një tjetër denoncim ka mbërritur në redaksinë e JOQ Albania nga një qytetar i zonës së Vorës, i cili ngre alarmin për problemet e vazhdueshme me energjinë elektrike.
Ai shprehet i indinjuar për ndërprerjet e shpeshta dhe luhatjet e tensionit që, sipas tij, po rrezikojnë të shkaktojnë dëme në pajisjet elektrike të banesës.
“Na dogjën pajisjet me këto luhatjet e tensionit. Në Vorë i ndezin dhe i fikin dritat për 1-2 sekonda, u bë e 4 ose e 5 herë që ndodh. Gjithmonë të paktën një herë në javë na ndodh e njëjta gjë. Nuk kanë drita fare dhe tani ka kaluar mbi dy orë!” – shprehet qytetari.
Denoncuesi thekson se është përpjekur të kontaktojë OSHEE për të raportuar situatën, por thotë se askush nuk i është përgjigjur.
“S’na hapin telefonin, na kanë marrë shpirtin! Tani do na lënë gjithë natën pa drita, siç e kanë zakon,” vijon ai.
Problemet me energjinë elektrike dhe neglizhenca e institucioneve përkatëse po rëndojnë gjithnjë e më shumë jetën e banorëve të zonës së Vorës, ndërkohë që pasojat e këtyre ndërprerjeve dhe luhatjeve po rëndojnë edhe ekonomitë familjare për shkak të dëmeve në pajisje.
