Julian Gjoshi, 27-vjeçari që vrau me armë zjarri Alfred Dedjan është marrë në pyetje pas vetëdorëzimit në polici.
I riu ka deklaruar para grupit hetimor se Dedjan e vrau pasi ndihej i ofenduar prej tij. Ai ka treguar se me 50-vjeçarin është takuar 10 ditë më parë, por edhe aty ka patur ofendime nga viktima.
Armën e krimit ai ka thënë se e ka hedhur mes disa shkurreve, anës lokalit ku ndodhi krimi, por kontrollet për gjetjen e saj pritet të nisin sot.
“Ndihesha i ofenduar, pasi sa herë që takoheshim më shante e ofendonte. Jemi takuar edhe 10 ditë para ngjarjes dhe sërish më ka ofenduar. Ditën e ngjarjes e kam marrë unë në telefon dhe i kam thënë hajde se po të pres për kafe. Sapo u ul e qëllova me armë. Unë atë e kam mbajtur me lekë e bukë kur punonte menaxher te Golden, pronë e familjarëve të mi. Pasi kreva vrasjen u largova menjëherë. Pistoletën e hodha jo shumë larg nga lokali, në anë të disa shkurreve“.
Gjoshi pasi kreu vrasjen ka qëndruar në fshatin Shkallnur të Kavajës, në një hotel. Ai ka qëlluar 5 herë në drejtim të Dedjas, por vetëm 3 prej tyre e kanë kapur në trup duke i marrë menjëherë jetën.
Nga këqyrja e vendit të ngjarjes, Policia i gjeti armë zjarri edhe viktimës, teksa të dy rezultojnë të skeduar për vjedhje dhe trafik narkotikësh.
