Në Berat është zbuluar një rast i mashtrimit me vaj ulliri bio, ku janë përfshirë baba e bir. Një 56-vjeçar është arrestuar për veprat penale "Fshehja e të ardhurave" dhe "Mashtrim me produktet ushqimore", ndërsa i biri 29-vjeçar është shpallur në kërkim. Të dy dyshohen se reklamonin vajin e përzier si bio në rrjetet sociale.
Sipas Prokurorisë, banesa e tyre ishte kthyer në ambient për përzierjen e vajrave të ndryshëm me substanca të panjohura, të cilat më pas i shisnin si vaj ulliri bio. Gjatë operacionit, policia sekuestroi rreth 3000 litra lëndë vajore të papërcaktuar, 1000 litra vaj kikiriku, një laptop dhe një printer që përdorej për printimin e etiketave.
Po ashtu, u konfiskuan 2.9 milionë lekë dhe 1800 euro, të cilat dyshohen se janë përfituar nga kjo veprimtari e paligjshme.
Njoftimi i prokurorisë:
Prokuroria pranë Gjykatës së Shkallës së Parë të Juridiksionit të Përgjithshëm, Berat në bashkëpunim me Seksionin për Hetimin e Krimit Ekonomik në Drejtorinë Vendore të Policisë Berat, arrestuan shtetasin A.A 56-vjeç për veprat penale ‘Fshehja e të ardhurave’ dhe ‘Mashtrim me produktet ushqimore’ kryer në bashkëpunim në më shumë se një herë, parashikuar nga nenet 180 dhe 288/c të Kodit Penal. Ndërsa u shpall në kërkim i biri, shtetasi D.A. 28-vjeç.
Prokuroria pranë Gjykatës së Shkallës së Parë të Juriksionit të Përgjithshëm Berat në bashkëpunim me policinë, arritën të provojë se të dy shtetasit, babë e bir në bashkëpunim me njëri-tjetrin kthyen banesën në ambient për përzierjejn e vajrave të ndryshëm me produkte ende të panjohura, duke i shitur nëpërmjet rrjeteve sociale si vaj ulliri bio.
Nga veprimet e para hetimore u sekuestuan rreth 3000 litra lëndë vajore e papërcaktuar, 1000 litra e dyshuar vaj kikiriku, një laptop dhe printeri me të cilin printoheshin etiketat postare si dhe 2 900 000 lekë dhe 1800€ të dyshuara të përfituara nga kjo veprimtari e kundraligjshme.
