Një nga viktimat e masakrës së Shkodrës, Flutura Basha është motra e Isa Harushës, ish-oficerit të policisë kufitare në Shkodër, i cili në vitin 2006, ka mbetur i vrarë në një atentat të organizuar në ambjentet e lokalit të tij në Shkodër.
Isa Harusha gjatë periudhës 2000-2006 ka qënë komandanti i njësisë policore kufitare “Renxhersat”, të cilët monitoronin vijën ujore të Liqenit të Shkodrës, me qëllim parandalimin e kontrabandës, trafikun e drogës dhe tregtinë e armëve përmes vijës ujore të liqenit që lidh Shqipërinë me Malin e Zi.
18 vjet pas vrasjes së tij dhe plagosjes së vëllai të tij Arben Harushës, në Shkodër ndodh një tjetër tragjedi, ku ngeli viktimë motra e tyre, si është është plagosur rëndë bashkëshorti i saj, Bashkim Basha. Ngjarja e rëndë e 18 vjetëve më parë ka ndodhur në lokalin “Univers”, i cili ishte marrë me qira nga vëllezërit Harusha dhe ndodhet në qendër të qytetit, mes xhamisë “Ebu Bekër” dhe “Kishës Orthodokse”.
Për vrasjen e shefit të “Renxhersave” Isa Harusha, policia e Shkodrës në atë kohë identifikoi si autorë vëllezërit Kolë, Pëllumb dhe Ergys Alija, të cilët kanë qëlluar me pistoletë kundër dy vëllezërve Harusha.
Në ngjarjen e fundit në Shkodër, tre persona Hamza Lici, Arlind Bushati, Flutura Basha, mbetën të vdekur dhe një i katër, Bashkim Basha, vijon të luftojë me vdekjen ne spitalin rajonal të qytetit verior.
E ndjera Flutura Basha dhe i shoqi po udhëtonin me motor në rrugë, ndërsa në çantë kishin disa shegë, për t’ua çuar tre fëmijëve të tyre.
