Policia spanjolle ka arrestuar 28 persona dhe ka çmontuar një organizatë të dedikuar për trafikimin e njerëzve për t'i shfrytëzuar në plantacionet e marijuanës.
Agjentët e Policisë Kombëtare kanë liruar dy shqiptarë që mbaheshin në dy plantacione marijuanë.
Oganizata kriminale merrte magazina me qira për të ngritur më pas plantacione marijuane brenda. Drejtuesi ishte një shtetas spanjoll, i cili merrej me lokalizimin e magazinës industriale, menaxhimin e qirave dhe blerjen e të gjithë materialit të nevojshëm për plantacionin.
Ndërsa anëtarët ishin përgjegjës për gjetjen e punëtorëve në vendin e tyre të origjinës në mënyrë që të kujdeseshin dhe të monitoronin plantacionet 24 orë në ditë. Këta të fundit monitoroheshin nga kontrollorë për të siguruar gjithçka të nevojshme dhe monitoruar lëvizjet e tyre.
Hetimi filloi në shkurt të vitit 2023 kur dy plantacione marijuane u vendosën në magazina industriale në qytetet Castellbisbal dhe Molins de Rei. Kur policia arrestoi dhe intervistoi një prej punëtorëve në këto plantacione zbuloi se ai ishte një viktimë e mundshme e trafikimit të qenieve njerëzore.
Shqiptari i arrestuar deklaroi se ishte i izoluar dhe se ishte mashtruar në Shqipëri nga një bashkatdhetar. Ky i fundit i premtoi një punë në Spanjë në një lavazh makinash, punë të cilën e pranoi pasi gruaja dhe djali vareshin financiarisht prej tij. Pasi i lehtësuan transferimin e tij nga vendi i origjinës në Spanjë, anëtarët e bandës e morën në aeroport shqiptarin dhe e transferuan direkt në një ndërtesë industriale brenda së cilës ishte një plantacion marihuane.
Në atë moment ata i hoqën sendet e tij, përfshirë pasaportën dhe celularin dhe i thanë se duhej të kujdesej për plantacionin, duke i dhënë një telefon me një kontakt të vetëm të regjistruar, i cili ishte ai që do t'i shpjegonte kujdesin për plantacioni dhe punët që do kryente, gjithmonë nën kërcënimin e dëmtimit të familjes së tij nëse ai nuk pranonte. Ky person ka qenë i mbyllur në plantacion prej tre muajsh kur Policia Kombëtare ka mundur ta lirojë.
Në plantacionin e dytë ndodhej një shqiptar tjetër me karakteristika të ngjashme dhe me të njëjtën kombësi, i cili kur u kap deklaroi se duhej të kujdesej për një plantacion marihuanë, por i ishte thënë se në Spanjë kjo veprimtari ishte e ligjshme.
Shqiptari u mbyll për dy muaj në një plantacion marihuane, pa kontakt me jashtë dhe pa pasaportë. Pasi u grumbullua e gjithë marihuana, ai u transferua në një plantacion tjetër të organizatës dhe aty u shpëtua nga Policia Kombëtare.
Vlen të theksohet se dy viktimat e liruara jetonin brenda plantacionit, pa mundur të dilnin jashtë, pa ndriçim apo ajrim natyral dhe duke ngrënë vetëm atë që ishte siguruar nga ndonjë anëtar i organizatës.
Pas analizimit të dokumentacionit të gjetur në dy plantacionet e çmontuara dhe me deklaratat e viktimave, u lokalizuan edhe gjashtë plantacione të tjera, të vendosura në Barcelonë, Tarragona dhe Castellón, të cilat gjithashtu u çmontuan dhe nuk u gjetën viktima të tjera.
