Tre persona kanë rënë në prangat e policisë ditën e sotme, pasi kanë përshtatuR një vilë trekatëshe si “vilë bari” në qytetin e Fierit, që së fundmi është përballur me disa aktivitete kriminale të substancave të paligjshme.
Erjon Marini alias Xhevair Gashi, që ishte pronari i vilës,ka rënë në pranga, teksa të njëjtën gjë policia ka bërë edhe me faturistin e OSHEE, Klajdi Gremin, si dhe elektricistin Behar Feta. Në këtë operacion, policia ka sekuestruar 181 bimë kanabisi, të rritura në vazo me ndihmën e llambave elektrike, që harxhojnë një sasi të madhe elektriciteti.
Shtëpia e barit ishte shtrirë në pesë dhoma të banesës, teksa janë sekuestruar edhe të gjitha pajisjet që shërbenin për kultivimin e kanabisit. Gjithashtu, u bë bllokimi i vilës trekatëshe, ku kultivoheshin bimët narkotike.
Vetëm pak ditë më parë më parë u gjetën edhe sy shtëpi bari në dy vila të tjera në Shijak dhe më pas në Vlorë, teksa më mirë të mos e imagjinojmë numrin e vilave që ende nuk janë parë nga policia. Me pak fjalë Shqipëria e ka kaluar në tjetër standard këtë aktivitet duke lënë shtëpitë e barit dhe kaluar në vila bari.
Kultivimi i lëndës narkotike padyshim që është një shkelje e rëndë e ligjit, por edhe vjedhja e energjisë elektrike përbën gjithashtu një krim, që rëndon direkt në kurrizin e qytetarëve, pasi nëse qeveria e rrit çmimin e energjisë, një arsye është edhe humbja që pëson OSHEE nga ky aktivitet.
Të arrestuarit:
– E. M. alias Xh. G., 44 vjeç, banues në Dërmënas, Fier, për veprat penale “Prodhimi dhe shitja e narkotikëve” dhe “Vjedhja e energjisë elektrike”. Ky shtetas është pronari i vilës në të cilën Policia zbuloi 5 ambientet e përshtatura për kultivim të bimëve narkotike;
-K. G., 40 vjeç, banues në Fier, me detyrë faturist i OSHEE-së, për veprën penale “Shpërdorimi i detyrës”;
-B. F., 47 vjeç, banues në Fier, me detyrë elektricist i OSHEE-së, për veprën penale “Shpërdorimi i detyrës”.
Vijon puna për identifikimin dhe kapjen e personave të tjerë të dyshuar të përfshirë në këtë veprimtari kriminale. Në bashkëpunim me Prokurorinë, vijon dhe hetimi pasuror ndaj pronarit të vilës, shtetasit E. M. Materialet procedurale i kaluan Prokurorisë pranë Gjykatës së Rrethit Gjyqësor Fier, për veprime të mëtejshme.