Pasi dy shtetas shqiptarë tentuan të martën të futnin 11 kilogramë heroinë në Kroaci nëpërmjet pikës kufitare Konavo nga Mali i Zi, bashkëkombasi i tyre 24-vjeçar tentoi dje të transportonte të njëjtën sasi droge përmes të njëjtit vendkalim me një automjet.
Policia e Dubrovnik-Neretvës thotë se zbulimi i sasisë së heroinës është bërë falë kontrolleve të imtësishme në doganë.
Ditën e djeshme, 24-vjeçari shqiptar u kontrollua nga policët kufitar pasi po udhëtonte me një makinë me targa shqiptare pak pas mesnate.
Pas dyshimeve të punonjësve të policisë makina e shqiptarit iu nënshtrua kontrolleve të tjera. Në pjesën e përparme, u gjet një hapësirë e modifikuar në të cilën ishin fshehur 20 pako me gjithsej 11 kg heroinë dhe një sasi e vogël kokaine. Nga hetimi u konstatua se heroina kishte për qëllim tregun e drogës në Evropën Perëndimore.
Shqiptari i arrestuar akuzohet për prodhim dhe trafikim të paautorizuar të drogave.