Alda Klosit, drejtoreshës së ish-zv.kryeministrit Arben Ahmetaj, i kanë vjedhur mbi 500 mijë euro(para dhe sende me vlerë).
Pastruesja e saj Rozeta Dobi dhe djali Havier Dobi akuzohen për këtë vjedhje e cila thuhet se ka ndodhur për motive personale.
Vjedhja ka ndodhur më 15 dhjetor në kohën kur Klosi ka qenë në SHBA dhe çelësin ia kishte lënë pastrueses. Kjo vjedhje e bujshme është zbuluar nga vajza e Alda Klosit e cila sapo ka parë shtëpinë rrêmujë ka telefonuar dhe njoftuar mamanë e saj.
Në dëshminë e saj para hetuesve, vajza adoleshente e Alda Klosit ka deklaruar se sapo ka hyrë në shtëpi ka parë se dera ishte e hapur, rafti në dhomën e gjumit ishte i hapur dhe të gjitha rrobat ishin të hedhura përtokë.
Dëshmia e vajzës së Alda Klosit:
Rreth orës 7:30 kam shkuar në shkollën “Sami Frashëri”, ku jam nxënëse në vitin e parë. Kam qëndruar në shkollë deri në orën 11:30.
Më pas jam ulur tek “X hotel” që ndodhej tek “Rruga e Barrikadave” ku kam pirë kafe nën shoqërinë e klasës.
Rreth orës 13:50 kam shkuar tek zyra e nënës, Alda Klosi tek zona e Gardës ku kam qëndruar vetëm për disa minuta dhe më pas në këmbë kam shkuar tek shtëpia në “Rrugën e Kosovarëve”.
Në momentin që kam qenë tek banesa, kam konstatuar se dera ishte pak e hapur. Jam futur në shtëpi dhe kam konstatuar se pjesa e kuzhinës ishte në regull dhe më pas jam futur në dhomën e gjumit ku kam konstatuar se rafti ishte i hapur dhe të gjitha rrobat ishin të hedhura në tokë. Pas kësaj, menjëherë kam telefonuar mamanë dhe i kam treguar për këtë situatë.
Ndërkohë raportohet se pasi ka telefonuar mamanë, vajza ka dalë jashtë në trotuar dhe ka nisur të qajë teksa priste mamanë. Kanë qenê banorët e zonës ata që kanë njoftuar policinë më pas.
