Pak kohë më parë, disa minorenë u ndaluan nga policia pasi kryenin vjedhje te sheshi Skënderbej gjatë festave në muajin dhjetor.
Këta minorenë të shtyrë nga varfëria dhe modelet e fitimit të parave të shpejta, krijuan një grup ku kryenin grabitje gjatë gjithë muajit dhjetor duke sulmuar bashkëmoshatarë.
Këta minorenë, një 17-vjeçar dhe tre 14-vjeçarë akuzohen për 17 episode vjedhjesh. Me frazën: “Ne jemi të fortët e sheshit, ne jemi ata që bëjmë terrorin në shesh”, minorenët nxënës në shkolla të ndryshme, u drejtoheshin me doreza hekuri dhe thika bashkëmoshatarëve të tyre që i pikasnin në distancë duke i përzgjedhur nga veshja që ata mbanin.
Idenë për të grabitur bashkëmoshatarët gjatë festave e dha njëri prej tyre pasi kishin nevojë për para dhe mendonte se të miturit frikësohen më shumë.
Çdo ditë fëmijët zgjidhnin errësirën dhe zonën nga sheshi Skënderbej deri pranë AKSHI-t për të kërcënuar me thikë e pyetur bashkëmoshatarët: sa lekë ke me vete.
Vetëm një 17-vjeçar është proceduar ndërsa 3 anëtarët e tjerë të grupit kanë shpëtuar për shkak të moshës.
17-vjeçari ka treguar para hetuesve se prindërit e tij po divorcohen dhe muajt e fundit nënë e bir lëvizën në shtëpi të ndryshme me qera, pasi nuk kishin para të paguanin. Ai u lut që t’i jepnin mundësi të shkojë në shkollë. Për 17-vjeçarin, gjykata vendosi detyrim paraqitje, ndërsa për 14-vjeçarët emrat e tyre thjesht janë shkruar në kartelat e policisë kriminale.