Një ngjarje tronditëse ka ndodhur në Shkodër. Një grua e identifikuar si Orjana Gremi 32-vjeçe, ka sjellë në jetë një fëmijë një javë më parë, ndërsa dje e ka mbytur në lumin Kir në Shkodër. Foshnja tashmë e pajetë kishte ardhur në jetë në datë 30 dhjetor 2022, një ditë para Vitit të Ri 2023. Policia ka arrestuar Orjanën, nënën vrasëse të fëmijës së saj, teksa njofton se në momentin kur e ka gjetur foshnjen, ka konstatuar se është një bebe djalë vetëm 7 ditëshe, i pajetë.
Njoftimi i policisë për rastin e Shkodrës:
Strukturat Hetimore të Drejtorisë Vendore të Policisë Shkodër, bazuar në inteligjencën informative, se mbrëmjen e djeshme, një shtetase dyshohet se kishte braktisur foshnjën e saj, të seksit mashkull, të lindur më datë 30 dhjetor 2022, dhe mund ta hidhte në lumin Kir, kanë organizuar punën për verifikimin e këtij informacioni të marrë. Si rezultat i kontrolleve të ushtruara nga shërbimet e Policisë, gjatë mbrëmjes së djeshme dhe orëve të para të mëngjesit të sotëm, në vendin e quajtur Postribë, në lumin Kir, u gjet i pajetë, trupi i foshnjës së 32-vjeçares e cila e kishte hedhur atë në lumë gjatë natës.
Shërbimet e Policisë kanë shoqëruar në ambientet e Drejtorisë Vendore të Policisë Shkodër, shtetasen O. G., 32 vjeçe, banuese në fshatin Myselim. Në përfundim të veprimeve të para hetimore, të kryera në bashkëpunim me Prokurorinë pranë Gjykatës së Rrethit Gjyqësor Shkodër, u bë arrestimi në flagrancë i kësaj shtetaseje, për veprën penale “Vrasja me dashje”. Materialet procedurale i kaluan Prokurorisë pranë Gjykatës së Rrethit Gjyqësor Shkodër, për veprime të mëtejshme.