Tashmë është e konfirmuar! Vrasja e Edmond Papës është një hakmarrje e hapur për vrasjen me eksploziv të Aleksandër Sadikajt në afërsi të TEG-ut. Së fundmi është bërë me dije se një nga miqtë e Aleksandër Sadikaj është ekzekutori i Edmond Papës pak ditë më parë në Tiranë, pranë urës së Selitës.
Ai quhet Andrew Bode dhe ndodhet në kërkim nga policia. Dyshohet se autori i krimit ndodhet brenda republikës së Shqipërisë, por nuk po gjendet askund. Bode është ndihmuar nga miku i tij, njëkohësisht edhe mik i Aleksandër Sadikaj, Albano Velo, djali i një efektivi policie, i cili u pezullua pas arrestimit të të birit.
Bode dhe Velo, duket se kanë qenë të vetmit që e kanë ditur konfliktin e Aleksandër Sadikajt dhe Edmond Papës dhe kështu kanë kryer hakmarrjen. Albano Velo ka luajtur rolin e shoferit, ndërkohë, që Bode e ka ekzekutuar Papën, i cili sapo kishte dalë për të pirë kafen e pasdites.
Deri më tani dyshohet se vrasjet kanë ndodhur për larje hesapesh të drogës, por ende nuk dihet konkretisht se për çfarë çështje bëhet fjalë.
