Tashmë është zyrtare! FSHF ka konfirmuar se braziliani është trajneri i ri i Kombëtares shqiptare.
Në njoftimin publikuar në faqen zyrtare, FSHF bën me dije se Silvinjo do të firmosë një kontratë 18-mujore.
48-vjeçari do të zëvendësojë Edi Rejën, të cilit i mbaroi kontrata në fund të nëntorit.
"FSHF arrin marrëveshjen me trajnerin brazilian Sylvio Mendes Campos Junior. Marrëveshja mes FSHF dhe stafit të ri drejtuar nga Silvinjo parashikon një kohëzgjatje 18-mujore deri në përfundim të Euro 2024 dhe aspekti financiar do të bazohet në rezultatet dhe arritjen e objektivave. Marrëveshja ka në thelb të saj arritjen e objektivit të vetëm që ka Shqipëria në këto eliminatore, kualifikimi për në finalet e Euro 2024. Në rast të arritjes së objektivit është rënë dakord që trajneri dhe stafi i tij të përfitojnë bonuse të konsiderueshme", njofton FSHF.
Për herë të parë në historinë e saj dhe pas disa vitesh e orientuar drejt trajnerëve italianë, Kombëtarja kuqezi do të drejtohet nga një trajner brazilian. Ndihmësa të Silvinjos te Shqipëria do të jenë argjentinasi Zabaleta dhe braziliani Dorival Guidoni.
