E gjithë shqiptaria është në dijeni të shijeve të shtrenjta të ish zv/kryeministrit Arben Ahmetaj. Nëse hotelet ku ai akomodohet nuk kanë kazino, për tigrin e Rilindjes nuk vlejnë… e këtë pikë të dobët ia ka ditur mirë edhe Klodian Zoto, bosi i inceneratorëve.
Nëse nuk e bëni dot lidhjen e personit më të kërkuar të momentit për aferën korruptive të 430 Milionë € me ish-numrin dy të qeverisë, ju rikujtojmë se kur janë firmosur miliardat që i kanë kaluar Zotos, Ahmetaj, atëherë ministër Financash ishte shoqërues i këtij të fundit i ulur në Range Rover.
Së fundmi, gazetari Adriatik Doçi ka bërë publike pagesat që Zoto ka bërë me kartën e tij të kreditit në emër të Tigrit të PS dhe bashkëjetueses së tij Erjola Hoxhës. Çifti kanë kaluar tri net romantike gushti në hotele me 5 YJE në Francë e Gjermani e sponsor i romanticitetit ka qenë 3500 euroshi i Zotos.
Ndërkohë që tigri relaksohej në hotelet më të mira të rivierës franceze e luksit gjerman, paratë e popullit i futeshin Zotos në xhep e askush nuk e hetonte.
Kjo histori është akoma më e thellë, pasi në aferë janë të përlyer edhe prokurorë të SPAK e opozita bashkë. DASH ka lëvduar pak ditë më parë punën e drejtësisë shqiptare së bashku me ambasadoren në largim Yuri Kim, por sipas gazetarit Doçi, prokurorët e SPAK Eneid Nakuçi dhe Klodian Braho kanë fshehur provat që fajësojnë Ahmetajn. Për këtë ky i fundit ka depozituar edhe një kallëzim penal.
Sipas provave, SPAK nuk po e heton Ahmetajn, ndërsa Berisha apo Kryemadhi nuk kanë hapur gojë për skandalin që është bërë publik në media duke e lënë të nënkuptuar implikimin në ndarjen e tortës së inceneratorëve e duke shfaqur qartazi marrëveshjen e bërë në prapaskenë e cila në ekranet e shqiptarëve paraqitej si një shfaqje opozitare.
Në vendimin e disponuar nga TCH, thuhet se ndarja e akteve kryhet për personat e tjerë nën hetim si Ledjana Bojaxhi e Zamir Stefani të dyshuar për shpërdorim detyre si dhe ndaj shtatë personave të tjerë dhe tetë shoqërive që dyshohen se abuzuan me fshehjen e të ardhurave dhe shmangien nga taksat.
Prokurorët nuk kanë kryer asnjë veprim shtesë dhe minimal përpos kërkesës së masës së sigurisë të asaj kohe dhe Ahmetaj i cili ka formosur një sërë shkresash as nuk është marrë në pyetje.