Edhe pse disa zyrtarë evropianë janë të bindur se hetimi i korrupsionit në Katar ka të bëjë me "disa njerëz", të tjerë argumentojnë se kalbja shkon shumë më thellë. Ndërsa autoritetet belge kryen një valë të dytë bastisjesh në Parlamentin Evropian, elita e Brukselit filloi të përballej me një pyetje të pakëndshme sa i përket hetimeve të ryshfetit në Katar: "Sa thellë shkon kalbja në sistem?"
Deri tani, hetimet policore kanë çuar në arrestimin e katër personave, përfshirë ish-zëvendëspresidenten e Parlamentit Evropian, Eva Kaili, me akuzën e korrupsionit, pastrimit të parave dhe pjesëmarrjes në organizatë kriminale.
19 shtëpi dhe zyra janë bastisur, janë arrestuar 6 persona, ndërsa autoritetet kanë vazhduar me konfiskimin e shumave të parave prej të paktën një milion eurosh. Disa zyrtarë dhe aktivistë të BE-së besojnë se më shumë emra do të dalin në skenë, ndërsa konfirmojnë se skandali i Katarit ishte një problem shumë më i thellë dhe më i përhapur me korrupsionin jo vetëm në Parlamentin Evropian, por në të gjitha institucionet e BE-së
Parlamenti Evropian, mbikëqyrja e dobët e aktiviteteve financiare të anëtarëve dhe fakti që shtetet ishin në gjendje të komunikonin me përfaqësues të BE-së pa i regjistruar ndonjëherë takimet në një regjistër publik përbën një "recetë korrupsioni", argumentojnë kritikët.
Michel van Hulten, një ish-deputet që tani drejton zyrën e Transparency International të BE-së, thotë se ndërsa rastet flagrante të korrupsionit që kanë të bëjnë me thasë me para kanë qenë të rralla, “ka shumë gjasa që në këtë skandal të ketë emra për të cilët nuk kemi dëgjuar ende. Nuk ka pse skandali të përfshijë vetëm çanta me para. Mund të përfshijë udhëtime në destinacione të largëta të paguara nga organizata të huaja dhe në këtë kuptim, ekziston një problem më i përhapur.”
Të tjerë, megjithatë, duken më pak të bindur se hetimi i korrupsionit do të nxjerrë emra të rinj ose se ngjarjet që ndodhën të premten e kaluar do të zbulojnë një problem më të gjerë në BE.
I pyetur për shkallën e skandalit të ryshfetit, një zyrtar i lartë i Parlamentit Evropian, duke mos pranuar të identifikohet tha: “Sado serioze që është, kjo është një çështje e individëve, disa njerëzve që morën vendime shumë të këqija. Hetimi dhe arrestimet tregojnë se sistemet dhe procedurat tona funksionuan”.
Në të njëjtën kohë, shefja e Komisionit Evropian Ursula von der Leyen refuzoi t'u përgjigjej pyetjeve në lidhje me marrëdhëniet e zëvendëspresidentit të Komisionit Europian, Margariti Schina me Katarin në një konferencë shtypi, duke shkaktuar zemërim, të gazetarëve të Brukselit. Megjithatë, presidentja e Komisionit Evropian tregoi gatishmëri për të krijuar një organ të pavarur të etikës që mund të hetonte aktivitetet e paligjshme në të gjitha institucionet e BE-së.
Kujtojmë se Schina mori pjesë në ceremoninë e hapjes së Kupës së Botës në Katar duke përfaqësuar Komisionin Europian. Ai ka hyrë në “kornizën” e çështjes së korrupsionit me Katarin. Po ashtu ai vetë është kritikuar nga eurodeputetët për postimet e tij në Twitter për Katarin muajt e fundit. Ai e kishte vlerësuar Katarin për "progres të rëndësishëm dhe të prekshëm në reformën e punës", madje duke bërë thirrje për ruajtjen e këtyre reformave.
Në përfundim të analizës së saj ‘Politico’ shkruan se mënyra e trajtimit të këtij skandali tregon se si, përballë asaj që duket të jetë një shembull flagrant korrupsioni, anëtarët e sistemit të Brukselit, i përbërë nga mijëra burokratë të mirëpaguar dhe zyrtarë të zgjedhur, shumë prej të cilëve kanë imunitet ligjor si pjesë e punës së tyre, kërkojnë të mbrohen nga kontrolli që mund të kërcënojë të ardhurat ose të prishë karrierën e tyre.
