Për disa vende, çmimet e energjisë kanë arritur nivele historike gjatë vitit 2022. Çmimet e benzinës, energjisë elektrike dhe gazit natyror u rritën dhe kapën majat pasi pushtimi rus i Ukrainës prishi zinxhirët global të furnizimit me energji. Familjet dhe bizneset po përballen me fatura më të larta të energjisë në mes të luhatjeve ekstreme të çmimeve. Pasiguria rreth luftës duket e madhe dhe kostot e ngrohjes dimërore parashikohen të rriten.
Nisur nga pasojat globale të krizës energjetike, GlobalPetrolPrices ka rendit çmimin e energjisë për familjet sipas shteteve.
Çmimet globale të energjisë: Benzina
Me një mesatare prej 11,10 dollarë për gallon, familjet në Hong Kong paguajnë çmimin më të lartë për benzinë në botë më shumë se dyfishi i mesatares globale. Taksat e larta të gazit dhe kostot e larta të tokës janë faktorët kryesorë që qëndrojnë pas çmimeve të larta të benzinës. Ashtu si Hong Kongu, Republika e Afrikës Qendrore ka kosto të larta të gazit, me 8,60 dollarë për gallon. Si një importues neto i benzinës, vendi është përballur me presione në rritje të çmimeve që nga lufta në Ukrainë. Familjet në Islandë, Norvegji dhe Danimarkë përballen me kostot më të larta të benzinës në Evropë. Në përgjithësi, Evropa ka parë inflacionin në 10% në shtator, i nxitur nga kriza energjetike.
Ndërkohë, vendi ynë më listën me 100 shtete renditet në vendin e 26-të pasi një gallon benzine kushton 6.6 dollarë, duke lënë pas Italinë, Francën, Spanjën, Serbinë dhe Kroacinë.
Çmimet globale të energjisë: Energjia elektrike
Luhatshmëri ekstreme po shihet edhe në çmimet e energjisë elektrike. Shumica e çmimeve më të larta të energjisë elektrike shtëpiake janë në Evropë, ku çmimet e Danimarkës, Gjermanisë dhe Belgjikës janë rreth dyfishi i çmimeve të Francës dhe Greqisë. Çmimet e energjisë elektrike në shumë vende të Evropës janë më shumë se dyfishi ose tre herë mesatarja globale prej 0,14 dollarë për kilovat-orë. Gjatë tremujorit të parë të vitit 2022, çmimet e energjisë elektrike për familjet në Bashkimin Evropian u rritën me 32% krahasuar me një vit më parë.
Shqipëria renditet në vendin e 89 për çmimin e energjisë elektrike pasi kilovat/orë kushton 0.10 dollarë.
Çmimet globale të energjisë: Gazi Natyror
Tetë nga 10 çmimet më të larta të gazit natyror në nivel global bien në Evropë, me Holandën në krye. Në përgjithësi, çmimet evropiane të gazit natyror janë rritur gjashtëfish në një vit që nga pushtimi i Ukrainës. Lajmi i mirë është se sezoni i vjeshtës ka qenë relativisht i ngrohtë, gjë që ka ndihmuar që kërkesa evropiane për gaz natyror të bjerë 22% në tetor në krahasim me vitin e kaluar. Kjo ndihmon në zvogëlimin e rrezikut të mungesës së gazit që shfaqet më vonë gjatë dimrit.