Para pak ditësh, u njoftua se dy prokurorë të SPAK, Klodian Braho dhe Ened Nakuçi u kallëzuan penalisht për shkelje të rënda të procedurës dhe shpërdorim detyre.
Në kallëzimin e bërë nga gazetari Adriatik Doçi, denoncohej se prokurorët kanë trajtuar me dy standarde provat e siguruara nga e-mailet që kanë gjetur te kompjuterët dhe telefoni i Klodian Zotos në çështjen që lidhet me inceneratorin e Elbasanit.
Sipas kallëzimit në prokurori, por dhe nga informacione të publikuara në media, Arben Ahmetaj nuk është thirrur kurrë për tu marrë në pyetje nga Prokuroria e Posaçme, lidhur me inceneratorin.
Edhe në vendimin Nr. 7975, datë 14.11.2014, i nxjerrë nga dosja e Lëvizjes Socialiste në kallëzimin në SPAK, shprehet mendimi pro nga Ahmetaj për dhënien me koncesion të inceneratorit të Elbasanit, për shoqërinë Albetek.
“Ndjekja e procedurave të marrjes me koncension të Inceneratorit të Elbasanit nga finacimi me Partneritetin Publik Privat i është ngarkuar për ndjekje Ministrit të zhvillimit Ekonomik, Tregtisë dhe Sipërmarrjes, Z. Arben Ahmetaj dhe Ministrit të Mjedist Z. Lefter Koka. Të dy ministrat kanë që të pranishëm vet apo përfaqësuesit e tyre në të gjitha procedurat e ndjekura për këtë koncension. Me shkresë Nr. 7975 /1 Prot datë 14.11.2014 Z. Arben Ahmetaj shprehet parimisht dakort për Mendim për projektvendimin “Për përcaktimin e Autoritetit Kontraktues, përkatësisht Ministrinë e Mjedisit, për dhënien me Koncesion PPP të ndërtimit të Impiantit të Trajtimit të Mbetjeve urbane të Qarkut Elbasan, për prodhimin e Energjisë Elektrike”-thuhet në kallëzim.
Dokumenti mban firmën Ahmetaj për miratimin e dhënies se koncesionit te inceneratorit të Elbasanit.
Dy prokurorët e SPAK në kompjuterin e sekuestruar te Klodian Zotos, dhe pas ekspertimit që ata kanë kryer vetë në datë 03.03.2022, kanë parë e-mailet mes të cilave ishin dhe faturat e paguara të hoteleve për Arben Ahmetajn. Ekzistojne dyshimet qe dy prokuroret Klodian Braho dhe Ened Nakuci kanë devijuar hetimet duke mos marrë në pyetje Ahmetjan për të dhënë sqarime për këto fatura të paguara nga Zoto, para dhe pas dhënies se koncesionit te Elbasanit.
“Në mënyrë të qëllimshme për interesa të tyre dhe aspak për interes të një hetimi të plotë të gjithanshëm dhe transparent, të dy të kallëzuarit, meqenëse nuk bënë pjesë të provave të dosjes hetimore Ministrin Arben Ahmetaj, te materialet që janë gjetur në kompjuterin e shtetasit Klodian Zoto, bënë publike madje dhe pa hezituar fare materiale që i përkisnin hetimit”– citohet nga kallëzimi.
Për këtë arsye, tre të akuzuarit, dy prokurorët dhe ish-Ministri Ahmetaj akuzohen sipas kallëzimit, se kanë shpërdoruar detyrën dhe devijuar hetimet, ndaj për ta kërkohet arrest me burg në kallëzim dhe bllokimin e menjëhershëm të gjithë dokumentacionit dhe praktikës që ndodhet pranë SPAK.