Ish-sekretari i Brexit, David Davis shprehet se ligji i ri i propozuar nga qeveria mund të zgjidhë gjithë problemin që shqiptarët i kanë shkaktuar Britanisë, duke kaluar Kanalin me gomone dhe u dyndur drejt qyteteve angleze, teksa një pjesë e tyre bëhen pjesë e krimit të organizuar.
Davis shprehet se shqiptarët vetë janë njerëz të mirë, por ata që i ndihmojnë të kalojnë kanalin janë kriminelë dhe i mësojnë ata që të shfrytëzojnë ligjet britanike për të qëndruar. Davis merr shembullin e Suedisë, që i rikthen menjëherë emigrantët nga vendet e sigurta si Shqipëria.
SHQIPTARËT – “Problemi shqiptar është një problem i ri. Është rritur vitin e fundit, 12 mijë të ardhur vetëm në këtë vit, krahasuar me shifra të papërfillshme në një vit më parë. Sistemi ynë është dërrmues. Shqiptarët po vijnë nga një vend i sigurt. Një nga problemet është se sa më gjatë t’i mbash këtu, aq më shumë apele merr”.
SHEMBULLI SUEDEZ – “Suedezët janë një nga vendet që i respektojnë më së shumti të drejtat e njeriut e kështu me radhë, por që nga viti 2021 kanë thënë se nëse vini nga Shqipëria, nuk mund të kërkoni azil. Ktheheni menjëherë, nuk ka nëse, ose, por, je menjëherë në Shqipëri. I vetmi përjashtim është ndonjë rast i situatës humanitare”.
STRATEGJIA – “Kjo është gjysma e problemit. Pjesa tjetër është se mësohen se çfarë duhet të thonë para autoriteteve nga njerëzit që i sjellin këtu në mënyrë të paligjshme. Kini parasysh se vetë shqiptarët mund të jenë njerëz shumë të mirë, por ata që i sjellin janë kriminelë. Njerëzit që i kalojnë përtej Kanalit u thonë shqiptarëve të pretendojnë se janë trafikuar”.
PROPOZIMI – “Duhet me patjetër që propozimi i fundit të pranohet. Në rast se vjen nga një vend i sigurt, duhet të kthehesh menjëherë në shtëpinë tënde dhe ta ndjekësh nga atje çështjen tënde, jo nga këtu. E vërteta është e qartë”.
QËNDRIMI NË ANGLI – “Nëse ata qëndrojnë këtu për disa javë, do të gjejnë një avokat britanik dhe do të kthehen në Shqipëri. Nëse ata qëndrojnë këtu për disa vite, do të njihen me dikë, do të martohen dhe do të kenë fëmijë. Këtu historia më pas përfundon, sepse ata kanë të drejta familjare dhe mund të qëndrojnë .
Sa më shpejt të miratohet propozimi, aq më mirë do të jetë. Suedezët e miratuan këtë ligj në prill të vitit të kaluar dhe nuk kanë lëshuar asnjë miratim për azil që atëherë. Ata e bënë këtë nëpërmjet Gjykatës Evropiane, çka do të thotë se bazohet në të drejtën ndërkombëtare”.
FRANCA – “Marrëveshja e re e emigracionit me Francën nuk do të zgjidhë gjë. Policia franceze do t’i gjejë, do t’i shkatërrojë varkën, por ata do të vijnë sërish nesër me një të re. Ata nuk i arrestojnë”, përfundoi Davis.
