Një veprim i Gardës së Nderit të Forcës së Sigurisë së Kosovës (FSK) ka irrituar disa qytetarë dhe politikanë të Kosovës. Ata nderuan ushtarët serbë për të cilët ishte raportuar edhe në shtypin botëror e edhe nga personalitete të fuqishme se ishin përfshirë në krime mizore ndaj shqiptarëve të Kosovës, raporton gazeta kosovare Nacionale.
Më poshtë keni raportimin e 1912-s për të bëmat e pabesueshme të këtyre ushtarëve ndaj të parëve të shqiptarëve të Kosovës.
“Këtu qëndrojnë eshtrat e ushtarëve të rënë serbë, që vdiqën në luftërat 1912-1918” – shkruhej në pllakën përkujtimore që u nderua edhe nga Garda e Nderit të Forcës së Sigurisë së Kosovës më 11 nëntor.
Më 11 nentor duhet theksuar se shënohet fundi i Luftës së Parë Botërore.
Nderimi i FSK-së nxiti reagime të shumta në rrjete sociale dhe në mediat shqipfolëse, pikërisht për shkak të veprimeve mizore që kishin bërë ushtarë të ndryshëm serbë ndaj popullësisë shqiptare në Kosovë gjatë atyre viteve.
“Ky ështē një skandal i jashtëzakonshëm që poshtëron kujtimin e dhjetëra mijëra parardhësve tanë civilë të pafajshëm që u shfarosën nga ushtarët serbë që nderon ai lapidar.” – ishte komenti që e bëri anëtari i Kryesisë së PDK-së, Adri Nurellari.
Në anën tjetër, ambasadori gjerman Jorn Rohde që e shpërndau postimin kishte shkruar fare ftohtë këto fjalë:
“Bashkë me ambasadorin (e Francës) Olivier Guerot sot në orën 11 shënuan Armëpushimin e 11 nëntorit për t’i nderuar të gjithë ata që vdiqën për vendet tona në konfliktet dhe luftërat e kaluara dhe të tanishme.” – tha ai, derisa ofronte edhe fotografitë që u cilësuan si turpëruese për ushtarët e FSK-së.
Çka ndodhi me shqiptarët në atë kohë nga ushtarët serbë?
Në një artikull botuar në the New York Times më 31 dhjetor 1912 e të titulluar “Ushtria serbe la gjurmë gjaku; Mijëra bura, gra dhe fëmijë të masakruar në marshin drejt detit, thonë raportimet hungareze.” dokumentohen disa prej këtyre krimeve. Këto raportime do të publikoheshin edhe në The Daily Telegraph.
Më poshtë keni disa pasazhe nga ky raportim,e të cilat nuk rekomandohen të lexohen nga njerëz me ndjeshmëri të lartë:
“Gjatë marshimit përmes Shqipërisë për në det serbët jo vetëm që vranë dhe ekzekutuan në mënyrë të pabesë shqiptarë të armatosur, por me mizori si prej bishe nuk e ndalën veten edhe para njerëzve të paarmatosur e të pambrojtur, pleqve dhe grave, fëmijëve dhe foshnjeve në gji të nënave.”
“Mes Kumanovës dhe Uskubit (Shkupit) diku rreth 3 mijë njerëz u vranë. Afër Prishtinës, 5000, ekskluzivisht arnautë (shqiptarë), ranë në duart e serbëve, jo me anë të luftës së ndershme, por me anë të vrasjes së pajustifikueshme.”
“Për të kryer këto krime, ushtarët e tërbuar madje edhe shpikën metoda të reja të mizorisë për të kënaqur epshin e tyre për gjak. Në shumë fshatra shtëpive iu vu zjarri, dhe derisa banorët fatkeq iknin prej flakëve qëlloheshin para grave e fëmijëve të tyre, dhe më pas gratë e pambrojtura detyroheshin të shihnin fëmiët e tyre që bukfalisht copëtoheshin me bajoneta.”
Këto krime mizore ishin raportuar edhe nga një personalitet i madh në histori si komunisti Leon Trotsky (Lev Davidovich Bronstein).
Ai ishte dërguar nga Vjena në Ballkan në vjeshtën e vitit 1912 si korrespondent ushtarak i Kievskaya Mysl për të mbuluar ngjarjet që po ndodhnin në Luftërat Ballkanike.
Edhe Trotsky do të përshkruante në mënyrë të detajshme mizoritë e kryera ndaj shqiptarëve, ndërsa besohet se burim e ka pasur një person me emrin Dimitrije Tuqoviq (themelues i Partisë Social-Demokrate Serbe) që kishte shkruar ekskluzivisht për krimet kundër shqiptarëve.
Gazeta Nacionale raporton se i ka shkruar edhe Forcave të Sigurisë së Kosovës për të marrë një prononcim në lidhje me rastin por deri në këtë moment nuk ka marrë një përgjigje.
Ndërkohë, për një gjë të tillë së fundi kanë raportuar edhe mediat në gjuhën serbe, siç është rasti me Kosovo-Online.
Analisti Shkëlzen Gashi ka thënë se pjesëmarrës në ngjarjen ku u nderuan këta ushtarë serbë nga FSK-ja ishte edhe Xhelal Sveçla.
