Kreu i LDK-së, Lumir Abdixhiku pas takimit me kryeministrin Kurti ka thënë se në këtë takim nuk panë ndonjë plan nga ana e Qeverisë për daljen nga situata e krijuar.
Abdixhiku tha se në takim me kryeministrin nuk dëgjuan diçka të re nga deklarimet e mëparshme që ai ka pasur.
“Në këtë takim nuk kuptuam diçka më të re se deklarimet publike që Kurti i ka pasur dhe nuk pamë ndonjë plan për zgjidhjen e situatës së krijuar dhe ndonjë plan për koordinim me SHBA-të. Për ne kjo është zgjidhja e vetme adekuate në situatën në të cilën është Kosova. Kosova nuk duhet të bjerë pre e kurtheve për detsabilizimin e vendit. Për një ecje të tillë, Qeveria do të ketë mbështetjen tonë për aq kohë sa koordinohet me aleatët dhe ka plan të qartë për stabilizimin e çështjes së sigurisë në vend.
Nuk pamë plan konkret për dalje nga kjo situatë. Ne kërkuam plan konkret dhe koordimim me aleatët tanë. Ne kemi parasysh se destabilizimi buron nga sjelljet e Beogradit dhe Vuçiqit. Në përballje të tillë është jetike që Kosova duhet të koordinohet me aleatët. Ne kërkojmë që kjo Qeveri të sigurojë edhe ligjshmërinë edhe koordinim me aleatët, kjo na ka mësuar se i sjell stabilitet vendit. Çdo devijim në këtë rrugë i sjell Kosovës rrugë të paqartë.
Nuk ka koordinim mes Qeverisë dhe Amerikës, përderisa nuk ka konfirmim nga aleatët tanë se kjo po ndodhë”, u shpreh Abdixhiku para mediave.
Ndërkohë Kreu i PDK-së, Memli Krasniqi ka thënë se nga ky takim del jo shumë i sigurtë për rrugën në të cilën ka hyrë Qeveria dhe alternativën që ata kanë për të dalë nga kjo situatë.
“Nuk mund të them se dola me ndonjë siguri të madhe se qeveria e di në çfarë derjtimi është duke shku dhe çfarë veprime do të ndërmarrë për ta mbajtur situatën nën kontroll. Unë ia shpreha qëndrimin PDK-së se në këtë moment Kosovës i duhen veprime të përgjegjshëm, që ruajnë shtetësinë dhe sovranitetin në çdo centimetër të Kosovës”
Qeveria duhet të ndërmarrë veprimet që i takojnë dhe për këtë do ta ketë përkrahjen e PDK-së. Për veprimet të cilat e ruajnë krejt rezultatin e sukseset e arritura në të gjitha vitet e pas pavarësisë e që kanë rezultuar me integrimin e serbëve në të gjitha institucionet. Unë nuk mund të them me siguri se çka sot duhet të bëjë Qeveria për ta sjellë normalitetin. Sot kemi një situatë të re që ka mundur të shmanget, papjekuria dhe mungesa e koordinimit me aleatët ka sjellë një momentum që ka mundur të shmanget.
Ne kemi diskutuar gjërë e gjatë jo vetëm për këtë situatë, por edhe për procesin e dialogut, propozimin franko-gjerman. E kam thënë në vend se të vazhdojmë të fokusohemi në një marrëveshje gjithëpërfshirëse finale, ne sot po merremi me tema sporadike dhe teknike.
Këto kanë qenë disa nga konsideratat që më kanë shtyrë dje t’i drejtohem kryeministrit. Siç e thashë unë sot dal nga ky takim jo shumë i sigurtë që kryeministrin e Qeveria e dinë se në çfarë rruge kanë hyrë. Ne më shumë erdhëm për ta dëgjuar kryeministrin, diskutuam gjërë e gjatë por nuk jam i sigurtë se e dinë në çfarë rruge kanë hy dhe si do të dalin suksesshëm”, ka thënë Krasniqi para mediave.
