Një denoncim i rëndë, ekskluziv, ka mbërritur në redaksinë e JOQ Albania ditën e sotme. Bëhet fjalë për një rast të denoncuar nga prindi i një nxënësi për dhunë nga mësuesja mbi fëmijën e tij, rast i ndodhur shkollën 9-vjeçare Kushtrimi i Lirisë në Durrës.
JOQ ka mundur të sigurojë edhe kallëzimin penal së bashku me dëshminë e të miturit, nxënës i kalsës së gjashtë, i cili ka rrëfyer dhunën fizike që ka ushtruar mësuesja mbi të.
“Mësuesja më ka kapur nga mesi me thonj dhe më ka përplasur në tokë. Unë jam përplasur në tokë dhe nuk po ngrihesha dot nga dhimbja”,-dëshmon ai.
Prindërit e klasës të shqetësuar mbi rastin kanë shkruar në redaksinë e JOQ Albania duke shpjeguar se nxënësi ka bërë ankesën te drejtuesit e shkollës, duke u treguar shenjat në trup, dhe ata u shprehën se do e ndiqnin këtë rast, por jo vetëm që nuk reaguan por e këshilluan prindin të mos bënte kallëzim penal në organet ligjzbatuese, në mënyrë që të mbronin emrin dhe reputacionin e shkollës.
Babai i djalit me inicialet L.LL jo vetëm ka bërë kallëzimin penal ndaj mësueses me inicialet L.P por ia ka parashtruar rastin edhe Drejtorisë Arsimore e Durrësit, e cila pas disa ditësh nga ngjarja nisi një grup psikologësh e sociologësh për ta ndjekur çështjen, me target vetëm bërjen e rekomandimeve e jo marrjen e masave.
”Këto shqetësime iu transmetuan edhe ekipit të dërguar nga Zyra Vendore Arsimore, e megjithatë historia u zvarrit nga të gjitha palët përgjegjëse me shpresën që të sfumohej”,-denoncojnë prindërit për JOQ.
Ngjarja e rëndë nuk mbyllet vetëm me këtë rast, pasi pak ditë nga dhunimi i nxënësit M.LL., prindërit raportojnë për JOQ Albania se e njëjta mësuese dhunoi një nxënëse tjetër, po në të njëjtën klasë, duke e kapur në fyt e duke e shtrënguar fort te kyçi i dorës.
Fëmijët e klasës u ankuan te drejtuesit e shkollës dhe te prindërit për këto incidente dhe shumë prej prindërve u paraqitën të shqetësuar se nuk ndihen të sigurtë për fëmijët e tyre me një mësuese e cila dhunon fëmijët.
“Papërgjegjshmëria e drejtuesve të shkollës dëshmohet edhe nga fakti se teksa grupi i ZVA zhvillonte takim me prindërit e nxënësve të klasës për rastin e dhunës, mësuesja në fjalë intimidonte fëmijët duke u thënë se “nuk ju kam bërë gjë,” e madje duke kërcënuar nxënësin e dhunuar të mos tregonte”,-shkruajnë ata.
Dhe pas shumë ditësh nga kjo ngjarje e rëndë, të vënë nën presion nga prindi i prekur dhe prindër të tjerë, Komisioni i Etikës dhe i Sjelljes, i shkollës Kushtrimi i Lirisë, u mblodh dhe propozimi për marrjen e masës disiplinore “Paralajmërim për largim nga puna,” për mësuesen L.P.
Bordi i prindërve të klasës e konsideron këtë vendim “sa për të larë duart”, pasi e lejon mësuesen të vazhdojë rregullisht mësimin edhe pas dy incidenteve të dhunshme dhe duke i lënë prindërit të frikësuar se episode të tilla mund të ripërsëriten.
Çështja i ka kaluar për shqyrtim Prokurorisë së Durrësit.
“Nëse do të ishte dhunuar fëmija apo nipi a mbesa e Ministres së Arsimit apo e ndonjë drejtuesi rajonal, e sigurtë që kjo mësuese do të ishte pezulluar menjëherë deri në verifikimin e plotë të cështjes si në rrugë administrative apo penale”,-shkruajnë ata të shqetësuar.