Ditën e djeshme u zbulua se 11 shtetas shqiptarë janë deportuar në Tiranë brenda 24 orësh pasi kishin mbërritur në Angli me gomone. Ky rast i paregjistruar më parë ka ndodhur për një arsye shumë të fortë sipas autoriteteve britanike.
Mediat kanë zbuluar se 11 shqiptarët që u deportuan me avion "charter" mbërritën në Angli nëpërmjet Kanalit që lidh ishullin me Francën Veriore. Sapo shqiptarët kanë mbërritur në Angli, ata janë dërguar në një ish bazë ajrore në Manston, Kent, e cila po përdoret për të përpunuar kërkesat e emigrantëve që kalojnë Kanalin.
Sipas Home Office kur shtetasit shqiptarë kanë refuzuar të aplikojnë për statusin e azilantit ata janë deportuar menjëherë drejt Tiranës. 11 shtetasit shqiptarë u dërguan në aeroportin Stansted, ku hipën në një avion "charter" e u nisën drejt e në Tiranë.
Ky rast i shqiptarëve i cili mund të shënojë një përparim të madh në trajtimin e krizës së emigrantëve vjen shtatë javë pasi ish-sekretarja e Brendshme Priti Patel nënshkroi një marrëveshje me homologun shqiptar, Bledi Çuçi për një skemë të 'largimit të shpejtë' të emigrantëve.
Numri i shqiptarëve që mbërritën në Angli nëpërmjet Kanalit u rrit në fillim të verës. Tani shqiptarët përbëjnë 60 për qind të të ardhurve nga Franca veriore. Në total, rreth 37,000 emigrantë me gomone kanë arritur në tokën britanike që nga fillimi i vitit dhe të paktën 10,000 prej tyre besohet të jenë shqiptarë.
Në media thuhet se para verës, rreth nëntë në dhjetë shqiptarë kërkonin azil edhe pse në Shqipëri pse nuk ka pasur asnjë konflikt për më shumë se 25 vjet. Por proporcioni i aplikantëve për azil mendohet se ka rënë, pasi ata janë penguar nga skema e qeverisë për dërgimin e tyre në Ruandë. Britania ka në plan që emigrantët që aplikojnë për statusin e azilantit t'i dërgojë në Ruandë. Ka gjasa që ky plan të ketë ndikuar edhe në rastin e 11 shqiptarëve të dëbuar me avion "charter".
