Emigrantët shqiptarë sa dalin nga hotelet nisin punë në fermat e kanabisit brenda tre ditëve nga mbërritja në Mbretërinë e Bashkuar, ka zbuluar një hetim, raporton The Guardian.
Të rinjtë rrëfejnë se u liruan nga paraburgimi dhe shkuan në hotele ku ata rekrutohen nga bandat kriminale shqiptare për të kultivuar kanabis në fermat e ngritura në shtëpi boshe dhe ndërtesa industriale në të gjithë Anglinë dhe Uellsin.
Bëhet fjalë për të rinj rreth të 20-ave që punojnë për të shlyer borxhet prej 5,000 £, pasi kanë paguar kontrabandistët kurdë për udhëtime përmes kanalit të Doverit që zgjat deri në 40 orë me gomone.
Njëri prej tyre, duke punuar në një "fermë" në Londër, tha se kaloi shtatë ditë në "malet" e Francës pasi tre përpjekje për Kanalin u penguan nga policia që u shponte varkat. Në përpjekjen e katërt, ai u shpëtua nga roja bregdetare e Mbretërisë së Bashkuar kur gomones së tij i mbaroi benzina pas 11 orësh dhe filloi të lëvizte në mes të Kanalit.
“Ne u mbajtëm për tre ditë në një qendër paraburgimi dhe më pas u transferuam në një hotel. Arrita të flas me të afërmin tim që erdhi dhe më mori nga hoteli. Unë punoj në një shtëpi kanabisi për të paguar paratë që kam marrë borxh për të paguar udhëtimin me varkë,” i tha ai gazetarit shqiptar që e intervistoi.
Shqiptarët përbëjnë tani 60 për qind të emigrantëve që kalojnë Kanalin e Doverit, ku rreth 7,000 prej tyre mendohet se kanë mbërritur me gomone këtë vit. Shumica janë vendosur në hotele ku më shumë se 35,000 azilkërkues jetojnë me një kosto për taksapaguesit prej 4 milionë paundësh në ditë.
Intervistat, konfirmojnë se ata po rekrutohen në tregtinë e drogës. Shqiptarët dominojnë tregun e kokainës në jug të Anglisë dhe kanë zhvendosur vietnamezët si prodhuesit më të mëdhenj të kanabisit me origjinë vendase.
Kjo pason paralajmërimet e javës së kaluar nga sindikata e Forcave Kufitare se rritja e migrantëve kriminalë përbën një "rrezik të konsiderueshëm" për sigurinë kombëtare, pasi azilkërkuesit tradicionalë janë zëvendësuar nga "meshkuj të rinj të aftë" me lidhje të dyshuara me krimin e organizuar.