Ish-ministri Lefter Koka ndodhet prej disa muajsh në ambientet e paraburgimit, me gjykatën, që ka refuzuar disa kërkesa të avokatit të tij për të konvertuar dënimin në arrest shtëpie.
Ditën e sotme është dërguar kërkesa e radhës në GJKKO, teksa pas seancës është prononcuar avokati i ish-ministrit, i cili e argumenton kërkesën për ndryshimin e masës së arrestit me gjendjen e vështirë shëndetësore.
Jo vetëm kaq, por ai ka bërë një deklaratë mjaft enigmatike, me doza kërcënimi brenda saj. Ai shprehet se Lefter Koka, pavarësisht gjendjes së tij shëndetësore, do të tregojë të vërtetën e tij dhe do të nxjerrë fakte që nuk janë dëgjuar më parë.
Deklarata e avokatit: Sot ishte kërkesa e dytë që ka bërë zoti Koka për zëvendësimin e masës së sigurimit. Ai është në kushte të rënduara shëndetësore.
Të premten kjo gjykatë vendosi të rrëzojë kërkesën për zëvendësimin e masës për inceneratorin e Fierit pavarësisht se administroi mendimet e 5 ekspertëve që konkluduan që Koka është në gjendje të rënduar shëndetësore e nuk mund të vijojë të mbahet në paraburgim. Gjykata mori dhe rolin e mjekëve dhe të ekspertëve.
Sot ishte kërkesa për Elbasanin, seanca e radhës në 7 nëntor pra shumë larg sa i takon ecurisë. Në këto kushte ne si ekip ligjor i zotit Koka do kërkojmë sa më parë që cështja të shkojë në gjyq në themel.
Ai nuk mund të vijojë të jetë në paraburgim. I vetmi person që u ndalua në momentin e parë në shtëpinë e tij. Janë më shumë se 10 muaj në ato kushte shëndetësore në një shoqëri ku do mbizotëronte ligji ai sot do ishte i lirë.
Ftoj mediat në procesin me dyer të hapura ku do dëgjojni më shumë nga tani përvec akzuave politike me të cilat është arrestuar. Ai është vërtet i sëmurë por ende gjallë e do mbajë qënndrimin e tij përmes procesit ligjor në atë proces.
Hetimet kanë pasur kohë të mjaftueshme, janë 10 muaj që kanë kaluar duket hetuar prokuroria, nuk mund të zgjatet më se vijimi i mbajtjes në burg në këtë mënyrë në kushte të rënduara shëndetësore është i padrejtë.
Në gjykimin e themelit do keni mundësi të dëgjoni të vërtetën e zotit Koka, fakte e argumente që nuk i keni dëgjuar deri më tani, të cilat deri më sot janë bazuar vetëm mbi atë kallëzim politik e vendimmarrjet e gjykatave kanë zgjedhur rrugën politike.