Paraditen e sotme një incident i rëndë ndodhi në zonën e njohur si ish-Restorant Durrësi në Tiranë, në rrugën “Ferit Xhajko” pjesë e unazës midis Dispancerisë dhe Medresesë. Një grua që po kalonte tek vizat e bardha u godit nga një automjet, ngjarje kjo që në Europë as që mendohet se mund të ndodhë ndonjëherë.
Nga dëshmitë e qytetarëve por edhe nga vetë pamjet filmike dallohet se gruaja është goditur gjatë kohës që po kalonte vizat e bardha. Kjo pasi vizat e bardha janë rreth 2 metra në të djathtë, dhe nga përplasja mjeti e ka shtyrë përpara kalimtaren.
Pas këtij incidenti të rëndë në redaksinë e Joq Albania ka ardhur një numër i lartë mesazhesh nga banorët e zonës. Ata ankohen se kjo zonë këmbësorësh është njëra ndër më problematiket në Tiranë dhe se incidente të tilla tek këto viza të bardha janë të mëdha dhe shpesh kanë qenë fatale për këmbësorët.
Banorët denoncojnë se automjetet nuk i respektojnë kurrë këmbësorët ndonëse aty ka viza të bardha. Madje jo vetëm që nuk ndalojnë por automjetet lëvizin me shpejtësi të lartë mbi normën e lejuar duke e kthyer këtë pikë kalimi si një ndër më të rrezikshmet në Tiranë.
Qytetarët e zonës shprehen se e kanë tepër të vështirë të kalojnë rrugën sidomos në mëngjes kur duhet të shoqërojnë fëmijët në shkollë apo kopësht por edhe gjatë ditës e në darkë ku automjetet lëvizin me shpejtësi shumë më të lartë sesa limiti brenda zonave të banuara.
Duket se ky është pikërisht një ndër shembujt më të mirë që tregon dështimin spektakolar të Erion Veliajt dhe drejtorit të policisë, Met Rrumbullaku. Veliaj ka dështuar pasi nuk ka marrë në konsideratë ankesat e banorëve, ku fare mirë mund të vendoste një semafor për ta bërë të detyrueshëm ndalimin e automjeteve.
Ndërsa Met Rrumbullaku ka dështuar pasi policia e tij rrugore nuk është kurrë e pranishme në këtë rrugë për të mbikëqyrur dhe ndëshkuar shoferët “trima” që lëvizin me shpejtësi përtej normave të lejuara e madje shtypin edhe këmbësorët që kalojnë në vizat e bardha.
Nuk dihet se si Veliaj do të ketë fytyrë të vijë në këtë zonë e t’u kërkojë banorëve votat për zgjedhjet e ardhshme vendore. Por e sigurtë është se banorët e zonës çdo ditë rrezikojnë vdekjen tek këto viza të ashtuquajtura të bardha.