Banorët e Komunës së Kisella Vodës drunjtë për ngrohje do t’i marrin për 500 denarë më lirë për metër. Kjo ngaqë komuna do t’i ndaj subvencione për amvisëritë që ngrohen me dru.
“Alternativa më e leverdishme dhe e lirë për ngrohje gjatë këtij dimri për qytetarët ngelet ajo me dru. Kryetari i Komunës së Kisella Vodës ka vendosur që t’i qerasë qytetarët që ngrohen me dru me nga 500 denarë për metër kub”.
Thirrja publike do të shpallet për disa ditë, njoftoi për tv21 kryetari Orce Gjorgjievski. Ndersa si dëshmie duhet pasur sasinë e drunjve të blerë.
“Më konkretisht, në këtë thirrje publike mund të aplikojnë të gjithë ata që e kanë blerë këtë lloj energjie për ngrohje që nga prilli i këtij viti, deri në momentin e shpalljes së thirrjes. Për një metër kub dru zjarri do të paguhen 500 denarë, ndërsa qytetarët do të duhet të sigurojnë dëshmi për sasinë e drunjve të blerë. Pagesa do të bëhet sipas parimit të shërbimit të parë, derisa të mbarohen mjetet e parapara nga buxheti i komunës në shumë prej 1.200.000,00 denarë”, tha Orce Gjorgjievski – kryetari i komunës së Kisella Vodës.
Qytetarët e kësaj komune e përshëndesin masën e komunës, por për ta 500 denarë janë të pamjaftueshme krahasuar me çmimin e druve.
“Jo, 500 denarë, 4500 janë drunjtë ose 5000, çfarë janë 500 denarë, si do të ndihmojë… pensionistëve tu ndihmojë disi… nuk ka shanse.”
“Duhet t’i subvencionojnë që të ngrohen pa para, 10 kub t’i japin që ta kalojnë dimrin si duhet. Ky është subvencionim për mua se 500 denarë s’di si të them…”
“Duhet të ju lëshojnë, unë nuk shfrytëzoj dru aspak megjithatë ka njerëz që ngrohen me drunj dhe më bëhet qejfi sepse çmimet kanë shkuar në qiell, shtrenjtësi e madhe. Ja kam blerë këtu diçka po janë imtësia”
“Mirë, mirëpo 500 denarë nuk e di sa do të hynë në punë.”
“Nuk shoh shumë diferencë, 5500 sa janë drunjtë kur të shikosh është e kotë.”
“Mirë, super. Nuk janë të mjaftueshme por do të ndihmojnë pak.”
Zv/drejtori i NP Pyjet Nacionale Berat Dehari hedh poshtë zërat se nuk ka më dru në depo, deklaron se në dispozicion ka edhe 120 mijë metër kub dru për djegie të asortimenteve të ndryshme, nga gjithsej 450 mijë sa ka patur në fillim.
“Shqetësimet e qytetarëve janë nga depotë, deri sa unë kam informata para disa ditësh, ato janë furnizuar në mënyrë të rregullt dhe ka sasi të konsiderueshme. Do të shtoj edhe se këtë vit kemi pasur rritje të sasisë, për 20% krahasuar me vitet e kaluara, kemi më shumë sasi të drurit për djegie”, tha Berat Dehari – zv/drejtor i N.P. Pyjet Nacionale.
Ndryshe komuna e Kisella Vodës ka subvencionuar edhe banorët që përdorin stufa me peletë, si dhe fatura të energjisë elektrike për familjet sociale. Masën e fundit mund ta shfrytëzojnë rreth 2.400 amvisëri.
