Parimi ‘pagë për punë’ vlen edhe për mësueset lehona, dhe mësimdhënësit tjerë që për arsye të ndryshme janë me pushime mjekësore.
Një mësuese nga Ferizaj e cila ka lindur para dy javësh, nuk e ka marrë pagën që i takon si nënë lehonë, sipas Ligjit.
Ajo ka zbuluar për Gazetën Insajderi se pavarësisht që nuk ka grevuar bashkë me kolegët e saj për shkak të shtatzënisë, ende nuk e ka marrë rrogën.
Zëdhënësi i Qeverisë së Kosovës, Përparim Kryeziu, ka konfirmuar qëndrimin e ekzekutivit kundër ekzekutimit të pagave për mësimdhënësit grevistë.
“Parimi ‘pagë për punë’ do të respektohet. Mësimdhënësit që kanë mbajtur mësim do të kompenzohen”, tha Kryeziu të martën, kur ka shpërndarë shkrimin e Arbërie Nagavcit, ministres së Arsimit, pikërisht për këtë çështje.
Por, pagat nuk kanë dalë as për mësuesit që për arsye të ndryshme janë në pushim, ndonëse ministrja e Arsimit ka njoftuar se pagat janë realizuar për ata që i kanë pasë të dhënat.
“Ndonëse komunat janë përgjegjëse për organizimin e arsimit parauniversitar, janë punëdhënëse dhe e kanë obligim të raportojnë çdo muaj në Departamentin e Thesarit në Ministri të Financave, një gjë të tillë nuk e kanë bërë. Me kërkesë të ministrit të financave, Hekuran Murati, i kemi dërguar ato të dhëna që i kemi pasur të inspektorëve dhe zyrtarëve të MASHTI nga vizitat gjatë muajit shtator, në shkolla e çerdhe, me qëllim të realizimit të pagave për ta”, ka shkruar Arbërie Nagavci.
Mësuesit pa paga, minstrja e Arsimit tregon nëse do të ekzekutohen ato
Kryetari i Sindikatës së Bashkuar të Arsimit, Rrahman Jasharaj, ka thënë dje se nëse nuk procedohen pagat deri me 5 tetor, mund të kthehen sërish në grevë.
Ai tha se vendimin e Qeverisë për mosekzekutimin e pagave për mësimdhënësit grevistë e cilësojnë si dëshirë të kësaj të fundit për vazhdimin e grevave dhe konflikteve.
Nëse pagat nuk dalin, SBASHK do ta merr këtë vendim
E para e ministrisë, Nagavci, ka bërë të ditur se tashmë ministria që ajo drejton ka marrë vendim për kompensimin e orëve mësimore të humbura gjatë grevës së SBASHK-ut.
Në kuadër të këtij vendimi, MASHTI i ka bërë edhe një propozim Ministrisë së Financave lidhur me çështjen e pagave për mësimdhënësit.