Arjan Tase u rikthye në radhët e Policisë së Shtetit vetëm një muaj pasi kishte lejuar mbjelljen e hashashit në një parcelë në Vranisht të Himarës.
Parcela me 6690 rrënjë kanabis u pikas gjatë një monitorimi me avion të Guardia di Finanzia më 3 Tetor, gjatë kohës që Tase ishte shef komisariati në Himarë.
Më 13 dhjetor u kryen nga Policia e Vlorës disa arrestime në lidhje me këtë operacion dhe për Tasen u caktua “pezullim i ushtrimit të detyrës ose shërbimit publik” për shpërdorim detyre. Kjo për shkak se u akuzua se kishte lejuar me dijeninë e tij dhe nuk kishte marrë masa që ata të mos mbillnin kanabis.
23 ditë më vonë, Gjykata e Apelit Vlorë ndryshon masën e sigurisë dhe u pushua pezullimi i tij për t’u rikthyer sërish në detyrë.
Prokuroria dërgoi dosjen e çështjes me emrat e 40 personave për gjykim dhe mungonte vetëm emri i Arjan Tases. Vetëm për të prokuroria e Vlorës kishte kërkuar pushimin e çështje.
Dosja e Tases u hetua nga ish-prokurori Maksim Sota, ironik është fakti se Sota u arrestua në operacionin “shpirti”, pasi sipas SPAK kishte ndihmuar trafikantët e kanabisit në qytetin e Vlorës.
Policia e Shtetit drejtohej nga Ardi Veliu në atë kohë.