Autoritetet gjyqësore të Brukselit janë në kërkim të pamjeve të të shtënave të ndodhura natën e së shtunës 11 qershor në Bulevardin Adolphe Max në Bruksel, pranë hotelit NH. Shqiptari Erion Hasanbelliu u qëllua me breshêri plumbash nga dy persona në shpinë dhe në të pasme dhe është dërguar në spital në rrezik për jetën. Disa ditë më vonë, një i dyshuar u arrestua në Vjenë.
Në kuadër të këtij rasti, hetuesit kanë gjetur imazhe të caktuara në rrjetet sociale por ata duan të marrin të gjitha fotot dhe videot e bëra në ose afër vendit të ngjarjes, si dhe të gjitha fotot dhe videot e publikuara tashmë në rrjetet sociale.
Kushdo që ka imazhe ose informacion mbi faktet mund të kontaktojë hetuesit nëpërmjet formularit të raportit në faqen e internetit të policisë federale, ose përmes numrit falas 0800/30300. Diskrecioni është i garantuar.
Pas të shtënave, gjyqtari hetues i Brukselit lëshoi një urdhër arresti evropian dhe ndërkombëtar ndaj shqiptarit 45-vjeçar Kasandër Noga. Të hënën, më 13 qershor, policia austriake ishte në gjendje të arrestonte burrin në një pallat në lagjen Donaustadt të Vjenës. Sipas Het Laatste Nieuws, Enrion Hasanbelliu dhe shqiptari që e ka qëlluar kanë një grindje prej njëzet vjetësh. Noga dyshohet se ka vrarë Aqif Hasanbelliun babain e Erionit, në vitin 2000 ndërsa ai ishte në një spital shqiptar. Një vit më vonë, Enrion Hasanbelliu dhe vëllai i tij Geron hapën zjarr ndaj Nogës dhe një shoku në Antwerp. Kasandër Noga u plagos rëndë, por i mbijetoi sulmit, ndërsa shoku i tij vdiq.
