Mosha nuk ka rëndësi për disa lojtarë. Një futbollist bullgar do të jetë përsëri lojtari më i moshuar në aktivitet e futbollit europian. Portieri Georgi Petkov, ka firmosur rinovimin me skuadrën e Slavia Sofies në Bullgari.
Klubi ka bërë të ditur se gardiani i cili mbushi 46 vjeç në muajin mars, do të vazhdojë të jetë pjesë e këtij klubi edhe në sezonin e ri. Në gjurmët e tij duket edhe legjendari italian, Gianluigi Buffon i cili është 44-vjeç dhe ka ndërmend të vazhdojë ende të luajë futboll.
Petkov ka nisur karrierën mes profesionistëve në vitin e largët 1994, teksa vishte fanellën e klubit Bankia në Bullgari. Ai ka luajtur edhe 18 ndeshje me përfaqësuesen e Bullgarisë, me të cilën është grumbulluar nga viti 1998, deri në vitin 2018.