Edhe dy javë nga fundi, sprinti final i Milanit dhe Interit për titullin

"Lufta" për titull në Serinë A vazhdon të jetë emocionuese. Milani ka fituar ndaj Veronës duke kapërcyer përsëri Interin dhe tashmë gjithçka do të vendoset në dy ndeshjet e mbetura deri në mbyllje të sezonit. Milani ka një avantazh prej 2 pikësh ndaj Interit, por edhe një tjetër jo edhe aq të vogël të ndeshjeve direkte me zikaltërit sa i përket bilancit të këtij sezoni.

Kjo do të thotë se në teori, Milanit i lejohet edhe një gabim në ndeshjet e mbetura, më saktësisht një barazim. Kështu, edhe me 4 pikë në këto dy ndeshje, Milani mund të shpallet kampion, pasi nëse Interi i fiton të dyja dhe skuadrat e mbyllin me pikë të barabarta, kuqezinjtë do të triumfonin.